BANBANCIN NETWORK DA SERVICE: DA ABINDA YA KAMATA KA SANI
A yau, ilimin fasahar sadarwa ya zama ginshiƙi a rayuwarmu ta yau da kullum. Duk inda muka juya, muna amfani da waya, kwamfuta, intanet da sauran na’urorin zamani. Amma sau da yawa mutane kan rikice idan aka ambaci kalmomin Network da Service, suna ɗaukar cewa kalmomin guda ɗaya ne ko kuma suna nufin abu ɗaya. A gaskiya kuwa, akwai banbanci mai girma tsakaninsu. Wannan rubutu zai yi maka cikakken bayani daga tushe har zuwa misalai na yau da kullum, domin ka fahimci bambancin Network da Service.
---
Menene Network?
Kalmar Network a ilimin sadarwa tana nufin haɗin da ake yi tsakanin na’urori domin su rinka musayar bayanai ko sadarwa. Wannan haɗin na iya kasancewa na’urar waya ce, kwamfuta, server, ko ma’adanar bayanai (data center). Duk lokacin da kake amfani da waya kana yin kira ko kuma kana amfani da intanet, ka sani cewa kana amfani da network.
Abubuwan da ke kunshe a Network:
1. Kayayyakin sadarwa (infrastructure): Kamar mast, tower, fiber optic, satellites, ko cables.
2. Na’urori (devices): Wayar hannu, kwamfuta, modem da sauran su.
3. Hanyoyin sadarwa (protocols): Ka’idojin da ake amfani da su wajen aika da karɓar bayanai.
Misalan Network:
MTN, Airtel, Glo, 9mobile a Najeriya.
Wi-Fi ko LAN a office ko gida.
4G/5G Network da muke amfani da su wajen yin browsing.
A takaice, network shi ne tushe ko hanyar sadarwa da ake amfani da ita domin a samu haɗin kai tsakanin mutane da na’urori.
Menene Service?
Service kuwa, shi ne ainihin abin da kake amfani da shi ta hanyar wannan network ɗin. Idan babu network, babu yadda za a bayar da service. A gefe guda kuma, idan akwai network amma babu service, mutane ba za su amfana da komai ba.
Abubuwan da ke cikin Service:
1. Voice Call (Kira): Wannan shi ne service mafi tsoho inda mutum zai iya kiran wani.
2. SMS (Text Message): Aika da karɓar saƙon rubutu ta hanyar network.
3. Data Bundle: Service da ke ba ka damar shiga intanet.
4. Mobile Money da Banking Services: Kamar MoMo (MTN), Airtel Money, Opay da dai sauransu.
5. USSD Services: Lambar da ake kira *737# ko *904# domin shiga banki ko wasu ayyuka.
Misalai:
Idan ka siya 200MB data bundle, wannan service ne.
Idan ka yi amfani da MoMo domin aika kuɗi, wannan ma service ne.
Idan ka yi kira daga waya ɗaya zuwa wata, ka yi amfani da service ta hanyar network.
Babban Banbanci Tsakanin Network da Service
Ga wasu muhimman bambance-bambance:
1. Ma’ana:
Network = hanyar sadarwa.
Service = ayyukan da ake bayarwa ta hanyar wannan hanyar sadarwar.
2. Tushen aiki:
Network shi ne ginin da aka kafa domin a iya sadarwa.
Service shi ne abin da aka samar domin mutane su amfana da wannan ginin.
3. Misali na rayuwa:
Idan ka ɗauki hanya (road), ita ce network.
Idan kuma mota ta bi wannan hanya ta kawo maka kaya ko ta ɗauke ka, wannan shi ne service.
4. Misalan a zahiri:
MTN = Network.
MTN Data, MTN Call, MTN MoMo = Services.
Muhimmancin Fahimtar Banbancin
Idan mutum ya fahimci bambanci tsakanin network da service, zai iya gano matsala cikin sauri. Misali: idan waya ta kasa yin kira, zai iya bincika ko matsalar network coverage ce ko kuma matsalar service subscription.
Wannan fahimta na taimakawa wajen yin amfani da fasahar zamani yadda ya kamata.
Haka kuma, ya kan taimaka wajen kare kai daga asarar kuɗi. Idan network baida kyau a unguwarka, zaka san ba daidai bane ka siya service mai yawa daga wannan network.
A TAƘAICE, Network shi ne hanya ko tsarin sadarwa da ake amfani da shi domin haɗa mutane da na’urori, yayin da Service shi ne ainihin abin da ake amfani da shi daga wannan hanya. Network na bada dama, amma Service ne ke kawo amfani. Wannan shine babban banbanci da ke tsakanin su.
Misali: idan ka yi rajista da MTN, ka shiga cikin network. Amma idan ka yi amfani da data ko ka yi kira, to ka shiga cikin service.
Saboda haka, a duk lokacin da ake magana kan fasahar sadarwa, yana da muhimmanci a bambance tsakanin tushen sadarwa (network) da ayukan da ake bayarwa (service). Wannan zai taimaka wajen samun ilimi, fahimta, da kuma ingantaccen amfani da na’urorin zamani.
Kuyi follow na Facebook page din mu domin samun sabbin update
Comments